1Jo 1 | BDD | STEP | Mwalo gwaeina yawasida weyahina Tamana ba'idana simiyamiya, 'oinega tauma wete tenamega 'ahesagoheya, ma wete nimamega loheyaina 'a'abitohoya, weyahina 'ihapwesa pwaima ta matamega 'a'iteya, ma tauna weyahina 'ahehepwaila 'oimiya, beno tauna yawasida miyamiya hatayaina huhuna, ma mwalo tauna tamana ba'idana simiyamiya ma 'oima 'ihapwesama.

1 John 1

Gwaeina yawasida weyahina

1 Mwalo gwaeina yawasida weyahina Tamana ba'idana simiyamiya, 'oinega tauma wete tenamega 'ahesagoheya, ma wete nimamega loheyaina 'a'abitohoya, weyahina 'ihapwesa pwaima ta matamega 'a'iteya, ma tauna weyahina 'ahehepwaila 'oimiya, beno tauna yawasida miyamiya hatayaina huhuna, ma mwalo tauna tamana ba'idana simiyamiya ma 'oima 'ihapwesama.

3 Tauna 'a'iteya ma 'ahesagoheya ma 'oimiya 'ahepwaila, 'oinega 'omi mahetemao tahe'iya'iyagu mahemahetena, ta wete Tamada ma Natuna Yesu Keliso mahetedao ta'ahwa 'iya'iyagu mahemahetena. 4 Coinega 'imi leta bewa 'aleleyawa, 'itauyawa ma 'ane wahasili, ma tayaliyaya moisa, 'omi ma tauma.

Yehoba 'asilala huhuna

5 Coinega wasa bewa sihegwaemaiya, ta 'ahepwaileya 'oimiya 'abehega Yehoba 'asilala huhuna, ma geya 'eta guguyou Yehoba 'oina 'imiyamiya. 6 Coinega 'eguma tupwa guguyou 'oina tamiyamiya, geya'abwa ta'e'abo'abo ma tagwae 'abehega, “Yehoba mahetedai ta'ahwa 'iya'iyagu.” Beno geya mumuga bwebwe'ana moisa. 7 Ma hesi 'eguma tupwa 'asilala 'oina tamiyamiya, gidemusa Yehoba 'ina tupwa 'asilala 'oina 'imiyamiya, beno ta'ahwa 'iya'iyagu moisa, weyahina Natuna Yesu bweyahinega 'igihe'ehaugita 'ida puiyao mabwaiyadi 'oidiyega.

8 Moisa, mabwaiyada topui tuwa, ma geya'abwa ta'e'abo'abowegita, ma tagwae “Taugu bwebwe'agu, ma geya 'igu puimo.” 9 Ma hesi 'eguma tahepwaila moisa ma tagwae “Yapui pwaiya.” beno Yehoba 'ida pui 'inuwasamudi ma 'igihe 'ehau hilegita, weyahina Yehoba mumugana dumwaluna ma ma'ana hemisa.

10 Ceguma tagwae, “Geya wete 'aigeda tuta yapui,” beno Yehoba ta'abo'abowe, weyahina 'ina gwae geya tahemihemisae.